قصيدة بعنوان ولد زايد وانت زايد

ابتدي واكتب حزن واقول هاتي ياحروف "=" لارحم من لاحزن والشيخ في وسط القبور

واحمد الله في البدايه والله الفرد اللطوف "=" واشكره رب البريه في الكآبه والسرور

ياخبر ماجبت غير الشين عن شوق الهنوف "=" ياخبر ليه المآسي ليش تلتفّ وتدور

ياخبر ماكنت اظنّك تستغل اصعب ظروف "=" ياخبر ترسل صواعق دون تثمين وشعور

ياخبر مافيك رحمه!؟ ماتحنّ ولا تروف!؟ "=" ياخبر وش هالقساوه ماحسبت انّك تجور

ياخبر عندي مئات الاسئله عندي ألوف "=" وكلما تكتب إجابه مالها عندي عذور

كلمة انّ الشيخ مات، انا بحذفها حذوف "=" حيّ وافعاله شهود وكل يومن في ظهور

كل فعل الخير حاضر زار للقبر ويطوف"=" وريحة العود المعتّق من ورى التربه تفور

صار قبرك يفتخر بك زاد رفعه مع شروف"="اطلب الله يسكنك جنّات عدنٍ في حبور

وانت شيخ العالمين وشيخ مروين السيوف"=" شيخ كلّ الحاضرين وشيخ منهم في الظهور

تعجز اصناف البلاغه تحصي اعمالك وقوف "=" نور شمسك ساطعه كيف تخفيه الستور!!

داركم من فعلكم وصف درّه بالوصوف "=" في نحر بنت الزمان وفي السواعد والصدور

وانت ياأفضل خلف تابعٍ خير السلوف "=" ولد زايد وانت زايد وانت منصور الجسور

وانت منصور السجايا وانت محمود الكفوف"="وانت منصور المعاني وانت بحرٍ من بحور

فيك خير وفيك حكمه فيك علم وبُعد شوف"=" حرٍ ابلج من نوادر من سلالات الصقور

بالشجاعه مثل عنتر ماتذل من الحتوف "=" وبالكرم حاتم وفعله هيل وصحون وبخور

والسواعد ماتحرّك لو تطيح من الكتوف "=" واللي اختاروك قومٍ من رفيعين القدور

والامارات العزيزه عاليه فوق القنوف "=" شاهره رمز السلام وحب واخلاص وعطور

وانتم حماة الوطن في صمود وفي صفوف "=" في السما والما وصحرا والصلابه في الثغور

سايرينٍ بالمراجل ماحصل منكم عزوف"=" سيرة الدين الحنيفي لاظلال ولا فجور

سدّد المولى خطاكم لين حشره والوقوف"=" ولرضا الرحمان سيروا والله الرب الغفور

والختم مثل البدايه رحمة الله لك سقوف "=" أمّنوا ياغايبين وسامعين وياحضور

كلما جيت انثني أرجع على زايد صروف"=" لاحدٍ يلومني هذا قمر كل العصور

وانت باقي في القلوب وفي الحنايا ياعطوف"=" لكن الله اللطيف ويسكنك جنّه وحور

والصلاة عداد وبلٍ هلّ وامطر بالشعوف "=" ولبست منه الفيافي ثوب مختلف الزهور

للنبي وآله وصحبه ومن تبعهم بمعروف "=" والتعازي للجميع وعظّم الله الأجور